Одговори на најчесто поставуваните прашања поврзани со тахографските уреди и мемориските картички.
Дигитален тахограф е уред во патниот сообраќај за бележење на брзината и поминатиот пат, како и за времето на работа и одмор каде што податоците се запишуваат во работната меморија и во мемориската картичка, а истиот овозможува чување на податоците за период од 365 дена.
Согласно Законот за работното време, задолжителните одмори на мобилните работници и возачите во патниот сообраќај и уредите за запишување во патниот сообраќај, возилата кои првпат ќе се регистрираат во Република Македонија од 16 јуни 2010 година со максимална маса со приклучно возило над 3,5 тони и автобуси за повеќе од девет патници, мора да имаат вграден дигитален тахограф.
Постојат четири видови на мемориски картички: возачка картичка (важи 5 години), картичка на превозникот (важи 5 години), контролна картичка (важи 2 години) и работилничка картичка (важи 1 година).
Постапката се иницира со поднесување на барање со соодветна документација до СМАРТ ИД СОЛУШН ДООЕЛ СКОПЈЕ како носител на јавно овластување. Прием на барања: ул. Стојка Цекова бр. 5 (Гази Баба), 1000 Скопје.
Редовна постапка: 60 евра + 18% ДДВ (во денарска противвредност). Итна постапка: 90 евра + 18% ДДВ (во денарска противвредност).
Картичката на превозникот е клуч за пристап. По потреба, овластена работилница може да ги преземе податоците со работилничка картичка и да му ги предаде релевантните податоци на превозникот. Картичката не ги чува преземените податоци.
Ако картичката е оштетена, неработна, изгубена или украдена, возачот мора рачно да запишува активности на лентата за печатење секој ден и да прави дневни отпечатоци. Забрането е возење повеќе од 15 дена без валидна возачка картичка.
Во менито за печатење изберете активности од возилото за одреден ден. Возачот мора да направи отпечаток на почеток и на крај од работниот ден и да ги чува заедно.
Штом околностите дозволат, возилото треба да се однесе на поправка во овластена работилница. Ако не може да се врати во базата во рок од една недела, поправката се прави на патот.
Податоците од возачката картичка се преземаат на секои 28 дена, а од дигиталниот тахограф на секои 90 дена. Обврска за чување: 24 месеци.